مركب
فردت شراعها في الهوا
وللبحر الكبير حضنت
وف عرضه متبختره مشيت
تعاكس النورس
وترسل وميضها للسماء
وعلى صورة القمر العاكسة على البحر عدت
علت خشخشاتها أنغام
طربت لها كنوز البحر غنت
وتراقص شعبه و مرجانه
وكتر لؤلؤ البحر
بعد رخوه ومماته
صدفته صحت
البحر هادي ورقيق بمده
وبجذره في حضنه خادها
وبهدوءه هدهدها وطمنها
ف للبحر شقت
وعلى هديره نغم غنت
لانوه تقدر عليه
ولا شراع ينكسرلي
طول مالبحر رايق لي
وأهي الشمس بعتت دفاها
بشعاعها يخايلني
مركب أنا يامحلى طياتي
مكتوب عليها قصيدة حب
من واحده لحبيبها
غايب بقاله سنين
ولا مره راسلها
كتبت له تناجي هواه
وتقوله واحشني
بس الزمن والمسافات
هما اللي حايشيني
ياتيجي تاخدني معاك
ياتيجي وماتمشي
وفي الختام يانور عيني
ببعت لك احلى سلام
وإستنى على الشط مكتوبي
حمله النسيم والموج
إتلقاه ماترحلشي
هستناك على شطي
بعد ماتقرا رسالتي
وفي إنتظار العائد
زمجر ريح الفلا
وعاصفة بالغيم هبت
ماج البحر بموجة صغيرة
على المركب عدت
غرقت معاها الفرحة
ماهي مركب ورق
في زهوها
انها من ورق نسيت
مالها في البحر غير الغرق
مركب ورق
مركب ورق وغرقت
#فايزه البغدادي
ليست هناك تعليقات:
إرسال تعليق