لحظات ممات
في العروق بتسري ينبض لها القلب
دقات غريبة سريعة مهلكة بتجري
رؤيةبضباب من دمع العيون
بين الجفون لاهي ساكته ولا بتهوي
وفي الراس سكون
زي مايكون العقل طفل نايم
وخايفه علية
من همسات الفكر يصحى ويبكي
أهذي بالكلام جواية
بسكون صمت القبور من براها
ومن جواها بيدوي
أبص في الوجوه
القاها من غير ملامح
ياترى دول بشر
ولا أيه من الخلايق مهوش واضح
حتى في المراية
مشوشه صورتي
هي دي أنا ولا حد واقف ورايا
ولاصورة شبح تلبسني
سكون مخيف يتنفس ألم
وكاني ماشيه جوايه بهرب مني
صحراء كبيرة جوه الذات
شمسها حارقه
وقمرها بالليل بالغيم متخفي
هبت عليها عواصف السنين
من جذور ثباتي بتقلعني
ماشية ماعارفه ولا بجري
يمكن اكون في بحر رمالها عايمه
ومن حلاوة الروح خايفة تغرقني
لحظات ممات من أية وليه
ودايمه ولا هتعدي
وضجيج سؤالي بعجز الإجابة قاتلني
ياترى الروح لساها جوايه
ولا انا مت من بدري
فايزه البغدادي
ليست هناك تعليقات:
إرسال تعليق