قربت لمريا
نشوف راسي حدايا
بانو شيبات
في لحاي شاعلات
خبروني
بزمان الصغر فات
فكروني
في جدي اللي مات
فين زين لخيال
فين شوار الرجال
فين قايد لجمال
على ظهورها حمال
جدي مزينو سلهامو
في الدوار ليه مقامو
جدي يالمقري الطلبة في القبة
يا مقدم السربة
وداق في الموسم
وتاد خيامو
لخميس ولثنين
يومين فيها صيامو
كبت الخيل من كل لقبايل
ديما جدي صايل وجايل
حملو مايل
يا الناهي عل لعيب
يالحاضر وهو غايب
يابو لقريب ولغريب
فين لحراثة فين لجماعة
فين الزراعة
فين حقي من القاعة
جدي رافع الراس
برح البراح في لعراس
مجد جدي بلا قياس
غنات الشيخة عيوط
حصباوي ومرساوي
واسم جدي
في لقوافي محطوط
قالت راكب عودو
ما مقيدو ما مربوط
جدي مول الشكارة
هاز لفقيه ليجارة
ومفقد اهلو بالزيارة
تفكرت جدي
حلف بلحلوف يذبح خروف
وذن في وذني حروف
وانا ملفوف
في حايك من الصوف
سماني عل اسمو لمعروف
حنة زغرتت ثلث تزغريتات
وقالت سعدي بولدي
لبساتني جلابة سوسدي
كبرت في لخنات
علمتني نمشي بدادوش
بخرتني
بعود لقماري لحر ما مغشوش
حنة يا منبع لمحنة
ف العبون حقي مصيون
من لحم الكنة
حنة في قلبها محبة
موسداني الركبة
قصعتها ما مثلها في البنة
جامعة لحفاد وعيالات لولاد
مضوية الخيمة في لعياد
مال حبابي كفاو وسارو
مال جدي خوى دارو
فين عودو لدهم
فين وثاقو فين جمالو
فين مطامرو
الموت غدار شحال من رجال
ورثونا أعمال وقبارو
جدي هو تراثنا يا عقال
من تراثنا
نكتبو تاريخ بلادنا واخبارو
محمد المؤذن مؤسس ورئيس جمعية كازابلانكا للتراث الشعبي
ليست هناك تعليقات:
إرسال تعليق