(( قلبي عليكي يا أرض سيتا )).
( بشعر العامية المصرية ).
تأليف أ / عبد الرحمن فتحي الحناوي .
الأربعاء :25 من أبربل سنة 2018 .
**********************************
قلبي عليكي يا أرض سينا *
ما أقدرش اشوفك في يوم حزينة *
دموع عينيكي دي غالية علينا *
أنا مش ناسيكي لكن أمانينا *
مزروعة فيكي بإيد أهالينا *
وشوقي ليكي اللي مخلينا *
نخاف عليكي يا غالية يا سينا *
الله عليكي يا حارسة المينا *
يا لابسة توب النصر يا سينا *
دا كل مصر عليكي حزينة *
والحزن فيكي مأثر فينا *
يارب زيح الغمة. اهدينا *
**********************************
شجر الزتون كتب الحكاية *
من البداية للنهاية *
شجر اللمون رفض الغوايه *
وحط همومه تحت الرحايه *
اسمع يا مصري ف يوم ندايا *
علمني صاحبي أصل الرماية *
رجع لي ابني حبيبي ضنايا *
انا لما أشوفه بيروح أسايا *
أرض الديانة سعدي وهنايا *
أرض الكرامة تعبي وشقايا *
أرض النزاهة سهري وعشايا *
أرض الأمانة اسمع معايا *
ارفع سلاحك شد الراية *
افرد جناحك احمي سمايا *
أرض البطولة تحكي الرواية *
قصة بطولة والنصر غاية *
**********************************
حكايتي دي من غير ما أعيد *
وعدوي واقف عالباب عنيد *
أسقيه بإيدي مر وصديد *
وأقوله كلمة زي الحديد *
كلمة جارحة فيها وعيد *
كلمة ترشق فيه وتبيد *
اترك سمايا غرد بعيد *
بلدنا لابسة توبها الجديد *
والفرحة طلة أهو من بعيد *
والشعب كله فرحان سعيد *
لأن بلدنا اليوم في عيد *
********************************
بلدي أبية فيها الصمود *
وسينا دية أرض الجدود *
هيا القضية حارسة الحدود *
شعبها حر رفض القيود *
رفض الهزيمة منذ الجدود *
وقال يارب حصني واذود *
ما يهمنا صوت البارود *
مين زيينا احنا الأسود *
جايبين لنا عدو لدود *
قاعد لنا علي الحدود *
وعينه سارحة زي الحسود *
والجبن مالي قلب الجنود *
**********************************
طهرنا سينا وقلنا سلام *
وزرعنا فيها أمل أحلام *
وقلنا نطلع بيها قدام *
حبها ف قلبي كأنه غرام *
رملها الأصفر دهب خام *
جوها الأجمل طول العام *
********************************
تحية من كل مصري ل (سينا ) في يوم العيد *
تحية حارة لكل مصري رجع لينا أو مات شهيد *
تحية غالية لكل جندي ف أراضينا بقلبه الحديد *
تحية سارة لكل بطل حقق لنا النصر المجيد *
تحية منا لأهل سينا هو دا العزم الأكيد *
يارب فرحة تعم علينا لاهل سينا والصعيد *
ووجه بحري ينضم لينا وأي نجع علينا بعيد *
دي كل حتة ف مصر أمانة ربنا يبارك ويزيد *
يارب ديم الفرحة علينا واحفظ لنا الوطن السعيد *
واجمع كل العرب علي كلمة بطل حكيم ورشيد *
------------------------------------------------
بقلم أ / عبد الرحمن فتحي الحناوي .
من / مصر
-------------------------------------------------
