•••••• حكمت المحكمه ••••••
اكتب يا حسين
وبإسم الشعب افتتح الجلسه
يا دفاع مدفوع من شال مرفوع
مولود من جوع كفه محنّى
وبصوت مسموع بتقول موجوع
ودفاعك كله كلام ممنوع
قرب خطى
خلصت دفاعك ليه ف سطرين
اكتب يا حسين
والشاهد على حاله مجاهد
لساه جاحد ويقول على نفسه
انسان فاهم ومشاكله
عماله تتفاقم
وقفاه لساه ملطوع قلمين
اكتب يا حسين
قولى يا نيابه
وارفعى فى صباع السبابه
الشاهد ليه عض انيابه
والمجنى عليه!
من فيكم واقف لحسابه
ونيابه ترد الناس صنفين
اكتب يا حسين
الصنف الاول عاش طبال
بيغنى ويرقص ١٠٠ موال
لو قال الحق فى يوم يعمى
ويخاف لتذول منه النعمه
وورانا يقول للظلم امين
اكتب ياحسين
والصنف التانى عايش وجبان
وضميره ف نفسه كمان هربان
وحياته مابين صبر ومُرين
اكتب يا حسين
المُر الإول صوت مخنوق
والمُر التانى بيحلم يوم
لوعيشته تروق
خايف من بكره ومن بعده
لويرحل هيسيب ايه بعده
وولاده يعيشوا ازاى بعده
من غير رجلين
اكتب ياحسين
المجنى عليه قول لى حكايتك
أنا شعب حياته مسلوبه
ثرواتى دايما منهوبه
والكل عاملنى سبوبه
أنا سوق مترخص للبشوات
بيتاجروا ف قوتى وبسكوتى
وبياخدوا كمان منى العلاوات
تعليمى يادوب حبة فكه
وبيسقط من نص السكه
والفاشل فينا بيترقى
والشاطر ياخد بمدقه
تعليم بيقولوا عليه قمه
والأجره يدوب حبة ملاطيش
دبلوم وبيطلع للقمه
بالواسطه وظيفه وبالبقشيش
والصحه اهى نايمه فى الإنعاش
ميت لوحتى علاجك كان بالكاش
أما البشوات دول على بره
بيسافروا ويتعالجوا بجره ....( جرة قلم )
محسود العيان لويدخل مستشفى
ويخرج ! ان عاش
أما التصنيع فأنا مستورد
طبعا مش أنا دولا البشوات
أنا باكل وأتفسح وأولد
طبعا دا كلامهم! . غير الإشاعات
وزراعه وصبحت معميه
القطن وراح بالملاغيه
والرز بنعمل له قضيه
محسود عليه يابن بهيه
أنا عايش راضى من الأخر
علشان الباشا أنا بتَّاخر
أنا عايز بس أعيش لى يومين
اكتب ياحسين
رد القاضى؛ راح ننظر فى القصه بحالها
ونشوف مين لغبط فى كيانها
وف أخر الجلسه يكون الحُكم
محكمه ..
للمجنى عليه وكل شهوده
عيشوا بوشين
اكتب يا حسين
بقلم// طلعت عامر
ليست هناك تعليقات:
إرسال تعليق