يانفس بوحى بهواكى
--------------
دعاك بيملا المشاكى
وصبرى حباله قصيرة
ياقلب ضاحك وباكى
انا صرت منك فى حيرة
****
ياما نفسى انده واهاتى
ياحلوة ياام الضفيرة
ياشاغلة فكرى ليلاتى
وبروحى كنتى الاميرة
****
ياللى انتى روحى فداكى
اهواكى من وانت صغيرة
عدى زمانى وناداكى
ماجبرتى منى جبيرة
****
ومسيرها تحلى الشمايل
بضحكة منك مثيرة
تفتن عليا بعمايل
سهلة وممكن خطيرة
****
ياملقا طفت نيرانى
وقعدت فوق الحصيرة
ابقى تعالى عشانى
نحكى الغناوى فى ليلة
****
انا روحى ارتاحت معاكى
وصبحتى لعمرى السفيرة
طبيبي وصفلى دواكى
ياام الملامح منيرة
****
ضيعت عمرى حداكى
ولقيتها نفس الوتيرة
صدك وهجرك ملانى
ياام المشاعر فقيرة
****
لو بس تسمع كلامى
تصبح حياتك يسيرة
ده العند كسر دماغك
ياغالىة فضيها سيرة
****
حجمت نفسى فى غلاكى
وحررت روحى الاسيرة
حلفت ماتعشق سواكى
بس انت كونى بصيرة
****
بلاش تبصى وراكى
نظرة تكون الاخيرة
ده انا حبى كان مبتداكى
ونهايته شكك وغيرة
****
ياغالية ارضى بقضاكى
وبلاها شكوى كتيرة
سبحانه ربى سواكى
ياام الملامح مثيرة
****
مين ده اللى قالك نساكى
ده انتى لقلبى الأثيرة
ساب العوالم وجاكى
يطلب تكونى السميرة
****
قلبى اللى قالك اديكى
انتى لحياتى المديرة
يخلص ياروحى اليكى
ولغيرك ماعادله سيرة
*****
بطلت اسمع لغاكى
اصل كلامك ده عيرة
وانا حبى يملا البواكى
حلى سنينى المريرة
---
طارق العيسوى
ليست هناك تعليقات:
إرسال تعليق