🎆🎆🎆...لحظة تأمل...🎆🎆🎆
/قصيدة بالعامية /
نزلوا دموعي وسالوا عالخدين
هزيت براسي وتمايلت عالجنبين
ما عرفت شو خطر ببالي
يمكن تذكرت حالي وين كنت ووين
سألت قلبي شو صاير بالدني
جاوبني قلبك صار مقسوم قسمين
الحب المضى مش ممكن ينتسى
مهما تجاهلتو ولعبت عالحبلين
بلحظة غمضت عيوني وصرت اتخايل
هالكنت اقعد قبالها يوم ويومين
أنطر تتطل من الشباك وتوميلي
وانا اخجل وإتلفت على الميلين
طلة قمر نيال من شافها
ونيال اللي حظي بنظرة من العينين
لو كان الصبر بينباع وبينشرى
لكنت اشتريت بدل المكيال مكيالين
لكن يا حسرة ال ما إلو حظ
ما بيقدر يشتري الصبر نقدي او دين
رح ظل ضوي شموع الامل
يمكن شي يوم نلتقي ما بعرف وين.
/بقلمي:يوسف محمود شحرور.
