( الشارع ماله اتغير ليه ؟ )
بشعر العامية المصرية .
الثلاثاء الموافق 4 من أكتوبر سنة 2018
*****************************
الشارع ماله يا اولادي اتغير قوي كدا ليه *
بياع علي فرشه ينادي والتوكتوك بيخبط فيه *
والزحمة كتيرة الساعادي الشارع جراله إيه *
تلامذة هناك الناحيادي مش عارفة تعدي ليه *
والحاجة هند ام فادي شايلة الهموم كدا ليه *
قدامها خس وجزر وعا الأرض بتبيع فيه *
وعم سلامة الفكهاني مكشر قوي كدا ليه *
بتوع البلدية ف ثواني جايين بحملة عليه *
محضر إشغال طريق و راميين بلاهم عليه *
والواد محروس أهو شايل شاي و قهوة علي ايديه *
وصاحب القهوة ينادي اتأخرت يا ( حرسة ) ليه *
هات واحد شاي مش عادي سكر حلو و حليه *
الناس ماشية يا اسيادي بخطوة سريعة ليه * رايحين جايين في الشارع مين فيهم قلبه عليه ؟
*******************************
يا عمنا خلي بالك وشوف الإشارة دي إيه *
واهتم دايما بحالك الأذي بييجي من إيه *
من إهمالك وانشغالك والشارع ركز فيه *
بص يمينك وشمالك الخط ما تدوسشي عليه *
وخفف السرعة مالك متسربع قوي علي إيه *
**** **** **** **** ****
هو دا شارع زمان اللي كان المشي فيه *
متعتنا وكل الأمان كنا بردو بنلاقيه ؟ *
الحفر زادت أكيد ومطباته كترت ليه ؟ *
والاشارات بالتأكيد ما بيحترمها حد ليه ؟ *
نفسنا الشارع يكون زي ما بنسمع عليه *
كله ماشي بالقانون ولا حد مضايقنا فيه *
ع الجنبين كل الفنون والجرافيك منقوش عليه *
ولوحات بتحكي تاريخنا و الآثار كمان تحكيه *
وشجر مضلل جميل منظره ما شاء الله عليه *
شارعنا زمان كان خالي والمتعة كانت فيه *
والنور مولع طوالي يا سحر وجمال لياليه *
دلوقتي الناس زهقانة م الشارع واللي فيه *
في معاشها الناس غرقانة من كتر جري عليه *
أكل ولبس وعلاج ومصاريف زايدة عليه *
والكل طبعا محتاج والبيت قد إيه يكفيه *
********************************
شارعنا مليان دوشة خد حبة صبر يا بيه *
واحمد ربك فيه غيرنا الشارع شايفه بعينيه *
مش قادر زيينا يمشي ولا قادر يتحرك فيه *
من ضرب النار والفتنة والدم اللي حواليه *
مش لاقي أمان استني روح شوفه بيبكي ليه ؟ *
********************************
الشارع دا نبض الناس وكل شئ بيبان فيه *
بيقيسوا بيه الإحساس والرأي الحر تلاقيه *
أدب سياسة اقتصاد مستكتر دول عليه ؟*
وترمومتر لحال الناس عرفت خطورته إيه ؟ *
**** **** **** **** **** ****
بقلم أ / عبد الرحمن فتحي الحناوي .
من مصر .
********************************
